ڊاڪٽر اجمل ساوند

اجمل ساوند، ڊاڪٽر: تعليمدان ۽ اسڪالر ڊاڪٽر محمد اجمل ولد عبدالرزاق ساوند جو جنم 18 جولائي 1982ع تي گلشير محلي تعلقي ڪنڌڪوٽ، ضلعي ڪشمور ۾ ٿيو. ڪئڊٽ ڪاليج ڪنڌڪوٽ مان انٽر ڪرڻ کان پوءِ مھراڻ يونيورسٽي ڄامشوري مان سافٽ ويئر انجنيئرنگ ۾ بي اِي (B.E) جي ڊگري حاصل ڪئي. ان کان پوءِ جين مونيٽ يونيورسٽي سينٽ ايٽائين فرانس مان، ڪمپيوٽر سائنس ۾ ماسٽرس، جڏهن ته ساڳي ئي شعبي ۾ پئرس، ڊيسڪارٽس يونيورسٽي، پئرس، فرانس مان پي ايڇ ڊي ڪئي. سندس پي ايڇ ڊي جو موضوع آرٽيفيشل انٽيليجنس (مصنوعي ذهانت) هو. پي ايڇ ڊي ڪرڻ کانپوءِ ساڳي يونيورسٽيءَ ۾ ڪجهه عرصي لاءِ رياضي ۽ ڪمپيوٽر سائنس جي شعبي ۾ بطور اسسٽنٽ پروفيسر ۽ ريسرچ ايسوسيئيٽ ٿي رهيو. هن کي سنڌي، اردو، سرائڪي، بلوچي، انگريزي ۽ فرينچ زبانن تي عبور حاصل هو. پئرس ڊيسڪارٽس يونيورسٽي طرفان کيس سال 2013ع-2014ع لاءِ ريسرچ ڪميشن ۾ پي ايڇ ڊي جي شاگردن جي نمائندگي لاءِ چونڊيو ويو. ڪئڊٽ ڪاليج ۾ ’شاهه بھارو هائوس‘ ميگزين جو سب ايڊيٽر پڻ رهيو. سندس ڪيترائي مقالا بين الاقوامي تحقيقي جرنلن ۾ شايع ٿي چڪا آهن. فرانس يونيورسٽي ڇڏڻ کانپوءِ ترت سنڌ ۾ اچي سکر آئي بي اي يونيورسٽيءَ ۾ بطور اسسٽنٽ ڊائريڪٽر ڪم ڪرڻ لڳو. 6 اپريل 2023ع تي جيئن ئي ڊاڪٽر اجمل ساوند پنھنجي اباڻي زمين تان واپس گهر اچي رهيو هو ته رستي ۾ اڻ ڄاتل هٿياربندن کيس گاڏيءَ مان لاهي فائرنگ ڪري قتل ڪري ڇڏيو، هڪ پروفيسر ۽ تعيلمي ماهر جي شھادت تي سنڌ سميت ملڪي ۽ بين الاقوامي ميڊيا جي ادارن پاران هن عمل جي سخت لفظن ۾ مذمت ڪئي وئي.

داخلا ۾ استعمال ٿيل تاريخون

1982.07.18  عيسوي

تعليمدان ۽ اسڪالر ڊاڪٽر محمد اجمل ولد عبدالرزاق ساوند جو جنم 18 جولائي 1982ع تيگلشير محلي تعلقي ڪنڌڪوٽ، ضلعي ڪشمور ۾ ٿيو.

2023.04.06  عيسوي

6 اپريل 2023ع تي جيئن ئي ڊاڪٽر اجمل ساوند پنھنجي اباڻي زمين تان واپس گهر اچي رهيو هو ته رستي ۾ اڻ ڄاتل هٿياربندن کيس گاڏيءَ مان لاهي فائرنگ ڪري قتل ڪري ڇڏيو.

شخصيتون - ڀاڱي جون ٻِيون داخلائون